ក្រុមហ៊ុនអង្គរហ្គោលប្តេជ្ញាចិត្តខ្ពស់ក្នុងការអនុវត្តគម្រូសាជីវកម្មប្រកបដោយការទទួលខុសត្រូវដោយស្ម័គ្រចិត្ត
នៅថ្ងៃទី១៨ ខែកញ្ញា ឆ្នាំ២០២៦ ក្រុមហ៊ុន Angkor Gold បានរៀបចំកិច្ចប្រជុំផ្សព្វផ្សាយ ស្ដីអំពីសកម្មភាពរបស់ក្រុមហ៊ុន និងយន្តការនៃការរាយការណ៍ លើកដំបូង ជាមួយសហគមន៍មូលដ្ឋាន និងអាជ្ញាធរមូលដ្ឋាន នៅភូមិតាងសេ ឃុំញ៉ាង ស្រុកអណ្ដូងមាស ខេត្តរតនគិរី។ ក្រោមការគាំទ្រដោយអង្គការ DPA កិច្ចប្រជុំនេះមានអ្នកចូលរួមសរុប ៣៣ នាក់ (ស្ត្រី ១១ នាក់) ដែលមាន ៣០ នាក់ជនជាតិដើមភាគតិចចារ៉ាយ ក្នុងនោះដែរមានយុវជន ០៦នាក់ ជនមានពិការភាពជាស្រ្តី០១នាក់ផងដែរ ព្រមទាំងមានការចូលរួមយ៉ាងកក់ក្ដៅពី លោក យឿត សុធា ជនបង្គោលរបស់ក្រុមហ៊ុន Angkor Gold ក្រុមប្រឹក្សាឃុំញ៉ាង និងក្រុមការងារអង្គការ DPA នៃគម្រោងស៊ែបបឺរ។
គោលបំណងនៃកិច្ចប្រជុំនេះគឺ ពន្យល់អំពីសកម្មភាពរបស់ក្រុមហ៊ុន និងយន្តការនៃការរាយការណ៍ ព្រមទាំងពង្រឹងការទំនាក់ទំនងរវាងក្រុមហ៊ុន សហគមន៍ និងអាជ្ញាធរមូលដ្ឋាន ដើម្បីឱ្យយល់កាន់តែច្បាស់ពីសកម្មភាពរបស់ក្រុមហ៊ុន និងយន្តការនៃការរាយការណ៍របស់ខ្លួនដោយសុវត្ថិភាព។ ប្រធានបទសំខាន់ៗរួមមាន៖• បង្ហាញអំពីសកម្មភាពរបស់ក្រុមហ៊ុន ផលប៉ះពាល់ដែលអាចកើតមាន និងវិធានការនៃការកាត់បន្ថយផលប៉ះពាល់ទាំងនោះ។
• យន្តការនៃការរាយការណ៍កង្វល់ ឬសំណូមពរ ទៅក្រុមហ៊ុន។
• យល់អំពីរបៀបនៃការឆ្លើយតបរបស់ក្រុមហ៊ុន ព្រមទាំងជំហានបន្តក្នុងការសហការ។
លទ្ធផលសម្រេចបាន៖ អ្នកចូលរួមបានស្វែងយល់អំពីសកម្មភាពរបស់ក្រុមហ៊ុន ស្គាល់អំពីជនបង្គោលរបស់ក្រុមហ៊ុន និងបានយល់ដឹងអំពីយន្តការនៃការរាយការណ៍ ព្រមទាំងការសាកល្បងប្រើប្រាស់មធ្យោបាយទាំងនោះផងដែរ រួមមាន ការរាយការណ៍ផ្ទាល់ និងតាមវិធីសាស្រ្តឌីជីផល តាមរយៈការសរសេរលិខិត ការផ្ញើសារសំឡេង ការហៅទូរស័ព្ទ ការចាត់អ្នកតំណាង និងការសហការជាមួយអាជ្ញាធរ។ ដោយការសម្រេចបាននេះ គឺមានការចូលរួមផ្ដល់យោបល់យ៉ាងសកម្មពីអ្នកចូលរួមទាំងអស់ ដើម្បីឱ្យយន្តការនៃការរាយការណ៍ងាយយល់ និងងាយប្រើប្រាស់សម្រាប់សហគមន៍មូលដ្ឋាន។
