នៅថ្ងៃច័ន្ទ ១១រោច ខែផល្គុន ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៤ ខែមិនា ឆ្នាំ២០២៥ ក្រុមការងារអង្គការ ឌី ភី អេ ប្រចាំខេត្តខេត្តព្រះវិហារ ដោយមានការគាំទ្រដោយគម្រោងរបស់ អង្គការ Manos Unidas បានរៀបចំ និងសម្របសម្រួលផ្តល់ពូជមាន់ និងចំណីមាន់ ដល់គ្រួសារក្រីក្រងាយរងគ្រោះ និងគ្រួសារបានបញ្ចប់អំពើហឹង្សាក្នុងគ្រួសារ សរុបចំនួន ៦៦ គ្រួសារ នៅក្នុងភូមិដូចជា ភូមិស្របាល ព្នៅ បុះ (ឃុំភ្នំពេញ) ភូមិគូលែនជើង ភូមិព្យួរជ្រូក(ឃុំគូលែនជើង) ភូមិរំចេក (ឃុំស្រយង់)និងភូមិដាន (ឃុំថ្មី) ក្នុងស្រុកគូលែន ខេត្តព្រះវិហារ ។

-ក្រុមការងារគម្រោងបានផ្ដល់ពូជមាន់ដល់គ្រួសារក្រីក្រងាយរងគ្រោះ ចំនួន ៦០ គ្រួសារ ដោយក្នុងមួយគ្រួសារទទួលបាន ពូជមាន់ចំនួន ២០ក្បាល និងចំណីមាន់ ចំនួន១១.៥ គីឡូក្រាម ដើម្បីជាទុនសម្រាប់ការចាប់ផ្តើមចិញ្ចឹមមាន់ ដើម្បីបង្កើនចំណីអាហារ និងការបង្កើនប្រាក់ចំណូលក្នុងគ្រួសារ។

-ដោយឡែកក្រុមការងារគម្រោង ក៏បានផ្ដល់ពូជមាន់ និងចំណីមាន់ ដល់គ្រួសារដែលបានបញ្ចប់អំពើហឹង្សាក្នុងគ្រួសារ ចំនួន៦គ្រួសារ ដោយក្នុងមួយគ្រួសារទទួលបានពូជមាន់ ២៩ក្បាល និងចំណីមាន់ចំនួន ២០ គីឡូក្រាម ដើម្បីអនុវត្តផែនការបង្កើនជីវភាពគ្រួសារ ផងដែរ។

សរុបពូជមាន់ដែលបានផ្តល់ជូនដល់គ្រួសារទាំង ៦៦គ្រួសារ មានពូជមាន់ ចំនួន ១,៣៨០ក្បាល និងចំណីមាន់ ៨១០ គីឡូក្រាម។ គោលបំណងសំខាន់នៃការគាំទ្រដល់គ្រួសារក្រីក្រងាយរងគ្រោះ និងគ្រួសារដែលបានបញ្ចប់អំពើហឹង្សាក្នុងគ្រួសារ គឺដើម្បីបង្កើនស្បៀងអាហារ និងប្រាក់ចំណូលសម្រាប់គ្រួសារទាំងនេះ ក្នុងចំណោមនោះក៏រួមមានផងដែរ ជនពិការ គ្រួសារក្រីក្រងាយរងគ្រោះដែលមានស្ត្រីជាមេគ្រួសារ និងគ្រួសារក្រីក្របំផុត។ ការគាំទ្រនេះ ក៏រួមបញ្ចូលផងដែរនូវការកសាងសមត្ថភាពលើបច្ចេកទេសចិញ្ចឹមមាន់ និងផ្តល់ការគាំទ្រការបង្វឹកយ៉ាងជិតស្និទ្ធ ដើម្បីបំពេញបន្ថែមនូវការខ្វះខាតបច្ចេកទេសក្នុងការចិញ្ចឹមមាន់ ក្នុងគោលបំណងដើម្បីបង្កើនប្រាក់ចំណូលក្នុងគ្រួសារ និងជីវភាពរស់នៅ។

រូបភាព ក្រុមការងារ អង្គការ ឌី ភី អេ ប្រចាំខេត្តព្រះវិហារ