សកម្មភាពចុះល្បាតព្រៃឈើ និងតាមដានការលូតលាស់ និងថែទាំកូនឈើរបស់សហគមន៍ព្រៃឈើព្រៃពោធិ៍មែកបួននៅថ្ងៃទី១៧ ខែតុលា ឆ្នាំ២០២៦ គណៈកម្មការ និងសមាជិកសហគមន៍ព្រៃឈើពោធិ៍មែកបួន ដែលមានទីតាំងនៅភូមិព្យួរជ្រូក ឃុំគូលែនជើង ស្រុកគូលែន ខេត្តព្រះវិហារ បានចូលរួមចុះល្បាតព្រៃឈើ ពិនិត្យតាមដានការលូតលាស់ និងថែទាំកូនឈើដែលបានដាំនៅក្នុងតំបន់ដីកសិរុក្ខកម្ម។ សកម្មភាពនេះមានអ្នកចូលរួមសរុបចំនួន ១០នាក់ ក្នុងនោះមានស្ត្រី ៤នាក់។
លទ្ធផលនៃការតាមដានកូនឈើតាមការពិនិត្យជាក់ស្តែង កូនឈើដែលបានដាំសរុបចំនួន ១,៣០០ដើម មានអត្រារស់រានមានជីវិតប្រមាណ ៨០%–៨៥%។ ក្រុមការងារបានសង្កេតឃើញថា កូនឈើមួយចំនួនត្រូវបានសត្វគោ និងក្របីជាន់បាក់ ខណៈកូនឈើខ្លះអាចដុះលូតលាស់ឡើងវិញបាន។ ការរកឃើញនេះបង្ហាញពីសារៈសំខាន់នៃការបន្តតាមដាន និងការពារកូនឈើពីការខូចខាតដោយសត្វពាហនៈ។
ស្ថានភាពព្រៃឈើក្នុងអំឡុងពេលចុះល្បាត ក្រុមការងារមិនបានរកឃើញសញ្ញានៃការលួចកាប់បំផ្លាញព្រៃឈើ ឬការទន្ទ្រានដីព្រៃឈើនៅក្នុងតំបន់ដែលបានចុះល្បាតនោះទេ។
សកម្មភាពនេះបង្ហាញពីការចូលរួម និងការយកចិត្តទុកដាក់របស់គណៈកម្មការ និងសមាជិកសហគមន៍ព្រៃឈើ ក្នុងការការពារធនធានធម្មជាតិ និងថែទាំកូនឈើដែលបានដាំ។ ការបន្តចុះល្បាត និងថែទាំកូនឈើជាប្រចាំ នឹងជួយលើកកម្ពស់អត្រារស់រានមានជីវិត និងការលូតលាស់របស់កូនឈើ ព្រមទាំងរួមចំណែកពង្រឹងការគ្រប់គ្រង និងអភិរក្សធនធានព្រៃឈើក្នុងសហគមន៍។
