ក្រុមការងារគម្រោង ICRC ខេត្តស្ទឹងត្រែងបានរៀបចំវគ្គបណ្តុះបណ្តាល ២ ថ្ងៃស្តីពី ការសិក្សាប្រព័ន្ធយេនឌ័រ នៅថ្ងៃទី ១៨ និង ១៩ ខែមីនា ឆ្នាំ ២០២៥ នៅក្នុងស្រុកសេសាន ខេត្តស្ទឹងត្រែង។ វគ្គបណ្តុះបណ្តាលនេះមានសិក្ខាកាមចូលរួមរៀនសូត្រ ចែករំលែក និងអភិវឌ្ឍខ្លួនចំនួន ៣១ នាក់រួមមានសមាជិកមកពី ក្រុមគ្រប់គ្រងគ្រោះមហន្តរាយក្នុងភូមិ (VDMG), ក្រុមយុវជនជួយសង្គ្រោះ (YRTs), និងក្រុមយុវជនភូមិ (YGs) មកពី ៨ ភូមិក្នុងនោះមានស្រ្តីចំនូន ២៨ នាក់ដែលបង្ហាញភាពជាអ្នកដឹកនាំរបស់ស្រ្តីក្នុងការអភិវឌ្ឍសហគមន៍។
វគ្គបណ្តុះបណ្តាលនេះផ្តោតសំខាន់លើការអនុវត្តជាក់ស្តែងដើម្បីបង្កើនសមត្ថភាពក្នុងការសម្រេចចិត្ត និងការដឹកនាំទាំងក្នុងគ្រួសារ និងក្នុងសហគមន៍។ តាមរយៈការពិភាក្សា និងការធ្វើសកម្មភាពជាក់ស្តែង ធ្វើឱ្យសិក្ខាកាមភាគច្រើន (៨៩%) បានយល់ដឹងយ៉ាងច្បាស់អំពីឧបករណ៍ GALS សំខាន់ៗចំនួន ៤ រួមមាន៖
- ទស្សនៈវិស័យដំបូងនៃគ្រួសាររីករាយ – កំណត់គោលដៅផ្ទាល់ខ្លួន និងគោលដៅរួម
- ដំណើរឆ្ពោះទៅរកទស្សនៈវិស័យ – ធ្វើផែនការជំហានដើម្បីសម្រេចបានភាពជោគជ័យ
- ដើមឈើតុល្យភាព – យល់ដឹងពីតួនាទី និងទំនួលខុសត្រូវរបស់ខ្លួន
- ផែនទីពង្រឹងភាពជាអ្នកដឹកនាំ – ពង្រឹងភាពជាអ្នកដឹកនាំ និងការចូលរួមក្នុងការសម្រេចចិត្ត
វគ្គបណ្តុះបណ្តាលនេះបានបញ្ចប់ប្រកបដោយភាពជោគជ័យ ដែលសិក្ខាកាមទាំងអស់បានបង្ហាញនូវភាពរីករាយនៅក្នុងការចូលរួមបញ្ចេញមតិ និងធ្វើការងារក្រុម។ ក្រុមការងារគម្រោង ICRC នៅខេត្តស្ទឹងត្រែងមានមោទនភាពក្នុងការចូលរួមលើកកម្ពស់សិទ្ធិស្ត្រីក្នុងសហគមន៍ ដើម្បីឱ្យស្រ្តីនិងយុវជនមានភាពជាអ្នកដឹកនាំ និងមានការចូលរួមក្នុងការសម្រេចចិត្តនៅពេលបច្ចុប្បន្ន និងអនាគត!
